東周刊陸叔的專訪《創「褲」路上》
AKIV創辦人關詠同（右）。近年本地跑風盛行，以今年渣打香港馬拉松為例，「達標跑手」報名人數按年升五成，其中跑手黃尹雋以兩小時二十一分○四秒衛冕香港第一，佢所穿嘅戰衣並非一般國際大品牌，而係本地薑AKIV。工欲善其事，必先利其器，運動員一向對比賽戰衣和裝備非常重視，而對於跑步呢項大眾喜愛運動，雖然大部分跑手都係業餘，但對於跑衣跑鞋一樣講究。
早前揾咗運動服裝品牌AKIV創辦人關詠同（Queendy）上我節目傾偈，解釋跑衣嘅散熱、透氣等各種功能，仲有跑褲嘅實用設計，原來好多蹺妙。
Queendy嘅創業旅程始於五年前疫情高峰。佢原本從事美容護膚品研發多年，主要供應產品畀美容院，疫情期間美容院停業，收入陷入谷底之際，佢開始萌生創業念頭。佢除咗係美容達人，亦係跑山愛好者，對裝備尤其重視，曾每月花超過八千港元買越野跑裝備。但即使裝備幾貴都好，佢以前跑山時試過一年內浸壞三部電話，事關大部分跑褲都無防水袋，一落雨就好大件事，故此佢覺得運動服裝市場大有可為，並趁美容業務停擺期間自家設計理想跑褲，務求打造一條有內膽又透氣嘅跑褲，同時附有防水袋。
由設計到銷售，Queendy全情投入「一腳踢」，由二○二○年中開始設計首條跑褲，經過多次測試和改良，直至二○二二年成品終於正式出爐。當時廿幾箱跑褲塞爆屋企，佢話諗返起都一額汗，點知初試啼聲下首批一千條跑褲全數火速賣出，比原定三年時間表提早達標。由此決心繼續研發產品，並交由跑手測試，如資深跑手文少杰、跑山領軍人物黃浩聰等，希望提高跑褲舒適度同功能性。例如經試着後，改用幼身褲頭帶、左右前方加拉鏈袋、加大褲腳開衩等。
創業至今近三年，Queendy慶幸暫未蝕過錢，最初由網店發展至今有幾十個分銷商，去年更逆市於佐敦開設專門店，創業路一步一腳印。品牌至今產出過萬條跑褲，並相繼推出跑衫、風褸、太陽帽、背囊等，除功能性，圖案設計上亦花心思，如聯同本地插畫師合作，及以香港地標為設計靈感，將本土元素融入產品之中。
對比大品牌，佢坦言公司小本經營，資金有限，難以負擔大型廣告宣傳，呢幾年能夠取得佳績，主要靠跑界口耳相傳。為提高品牌知名度，公司開始贊助慈善賽，如樂施毅行者、揹水一戰等，以達宣傳同慈善之效。現時陸續有跑會、政府機構、企業向公司招手，設計專屬運動衫，喺零售以外開拓另一業務板塊。